O ITMATI dobra ingresos e reafirma a súa aposta pola Industria 4.0

O Instituto Tecnolóxico de Matemática Industrial (ITMATI) amosou este xoves en rolda de prensa os seus logros e casos de éxito recentes. A información veu da man de Peregrina Quintela, directora deste centro galego de transferencia tecnolóxica (impulsado e integrado polas nosas tres universidades), quen complementou os datos sobre os froitos tecnolóxicos concretos recollidos en 2015 coas cifras de ingresos acadadas ese mesmo ano: practicamente o dobre do conseguido en 2014; en concreto aquelas aumentaron un 97,16 por cento, pasando de 551.529,35 euros a 1.087.372,89 euros en 2015, excluído o IVE. A memoria de actividades de ITMATI, sinalou, “plasma un importante incremento de ingresos e actividade, reflexo da consolidación do instituto”. O instituto naceu en 2014 para achegar solucións de produtividade e axilidade ao tecido empresarial e administrativo. Estas solucións abrollan de eidos como a matemática industrial, o modelado, a simulación numérica e, por suposto, o cómputo de información masiva (Big Data).
O ITMATI é, polo tanto, un dos puntais da nosa terra para sustentar o mellor desenvolvemento posíbel para a Industria 4.0. Así o explicou na rolda de prensa Peregrina Quintela: “A matemática industrial é unha tecnoloxía facilitadora clave á hora de falar de industria intelixente, xa que as ferramentas que son a base da industria 4.0 teñen o seu piar na tecnoloxía matemática”. No proceso de converter a industria en intelixente, vinculando o mundo físico ao virtual, o ITMATI, dixo, “está chamado a ser un referente para a industria galega, o conxunto da española e a internacional”.
Respecto dos casos de éxito, a directora deste centro de transferencia debullou as experiencias xeradas ao abeiro da Unidade Mixta de Investigación Repsol-ITMATI, cuxo obxectivo é investigar nos métodos matemáticos e numéricos de resolución de problemas atopados de maneira recorrente na actividade diaria de Repsol, especialmente nos ámbitos da simulación e optimización de dispositivos e procesos (a compañía petroleira busca incrementar a vida útil das baterías que usan os vehículos eléctricos e mellorar o proceso de recarga rápida, así como optimizar os procesos de toma de decisión, entre outros aspectos).
Peregrina Quintela tamén fixo fincapé no Proxecto LUMES, ao abeiro do cal desenvólvense novas tecnoloxías e ferramentas avanzadas para reducir grandes incendios forestais tanto en número como en superficie afectada. Grazas a LUMES, deuse forma a un sistema experto para a seguimento e xestión dos recursos que participan na extinción dun incendio e para a axuda na toma de decisións a xestión dos medios aéreos.
A directora do ITMATI tamén avaliou, entre outros, un proxecto coa empresa EcoMT cuxo obxectivo principal é a definición dun algoritmo que permite predicir o risco de incidencias ou falta de confort nunha rede de locais comerciais. Igualmente, fixo un percorrido polo acadado ao abeiro da súa iniciativa conxunta con FerroAtlántica, centrada na simulación numérica do comportamento eléctrico de fornos de arco para a produción de silicio, co fin de evitar o maior desgaste que se produce na zona da punta dos electrodos na parte central da cuba tras aumentos de potencia nos fornos, o cal afecta o rendemento xeral do forno.