Pontevedra acolleu sesións de adestramento en Zabbix, ferramenta que dará apoio ás retransmisións do Mundial
xoves, 5 de xuño do 2014
De Riga, a capital de
Letonia, vén de chegar á nosa terra o radio de influencia dunha
ferramenta de software libre para a xestión e control de
infraestruturas e servizos tecnolóxicos. Chámase Zabbix e segundo
nos contan é o punto en común entre as empresas e entidades
Inditex, Xunta de Galicia, R, POVISA, ING Direct e o vindeiro Mundial
de Fútbol de Brasil. De feito, a ferramenta en cuestión serve para
garantir o bo funcionamento dos servizos tecnolóxicos destas
empresas e entidades e tamén para exercer unha supervisión axeitada
nas retransmisións da Copa do Mundo que van correr a cargo de
Globo.com. Zabbix
presentouse estes días en Pontevedra da man de Unirede,
colaborador desta solución en Brasil e responsábel da xestión de
control de Globo.com.
A presenza de Unirede en
Pontevedra serviu entre outras cousas para impartir dúas
certificacións oficiais: Zabbix Certified Specialist e Zabbix
Certified Professional. Esta cita veu da man da firma TICgal,
emprazada na cidade do Lérez. A ela acudiron técnicos de Madrid,
Barcelona, Valencia, Pamplona, A Coruña e Vigo que participaron nas
sesións celebradas durante a semana do 26 ao 31 de maio nas
instalacións do Centro Social Novacaixagalicia. As sesións serviron
en boa medida para amosar “a versatilidade desta potente ferramenta
empresarial, inicialmente concibida para comprobar o estado dos
equipos e servizos informáticos, tales como servidores, equipos de
rede, aplicacións, servizos web e sensores, e hoxe en día
empregándose para xestionar o tráfico viario”. Ou sexa, en
proxectos máis propios de Cidades Intelixentes e servindo de punto
de control para os máis dispares elementos, desde prazas de
aparcadoiro, a variábeis ambientais como a temperatura, a humidade e
mesmo os niveis de contaminación do ar.
TICgal
Como dixemos, o encontro
en Pontevedra veu da man da firma TICgal, unha empresa nova con sede
na cidade e que centra parte da súa actividade en achegar e
desenvolver solucións informáticas para empresas e administracións.
“Conscientes da complexidade da actual conxuntura económica”,
informan os responsábeis de TICgal, “a empresa aposta pola
presentación de solucións imaxinativas e custo moderado, moitas
delas de código aberto, facendo os seus servizos accesibles para
PEME e autónomos en castelán, galego e inglés”.
Unirede
Unirede foi a empresa
encargada de amosar en detalle as posibilidades de Zabbix. Trátase
dunha empresa brasileira que leva actuando hai máis de 10 anos no
mercado corporativo, prestando servizos esenciais en infraestrutura,
soporte, adestramento e xestión estratéxica na área de Tecnoloxías
da Información e a Comunicación (TIC). Ten presenza en todo o país
irmán, con sedes en Porto Alegre, Río de Janeiro e São Paulo.
Zabbix
Zabbix é unha solución
empresarial de monitorización distribuída de código aberto
deseñada para supervisar o rendemento e a dispoñibilidade dos
servidores de rede, dispositivos, servizos e outros recursos TIC.
Zabbix é unha solución unificada de manexo e xestión empresarial
que permite aos usuarios recompilar, almacenar, xestionar e analizar
a información recibida da infraestrutura de TI , así como a súa
visualización e notificación por correo electrónico, SMS ou Jabber
cando se acadan os límites definidos. A empresa Zabbix creouse en
2005. É unha firma de desenvolvemento de software con sede en Riga,
Letonia, e unha filial en Toquio, Xapón. O produto principal da
compañía é a devandita solución Zabbix. A empresa do mesmo nome
ofrece unha ampla gama de servizos comerciais, tales como soporte
técnico e consultivo, integración de Zabbix, implantación e
desenvolvemento de servizos personalizados, así como formación
profesional no devandito recurso informático.