Rexeitan o peche cautelar de Elrincondejesus.com

Nos últimos meses son moitas as causas xudiciais ao redor das redes P2P en España, coincidindo case todas en destacar que o intercambio de ficheiros a través da Internet non constitúe un acto delituoso, polo que os últimos xuízos iniciados apuntan á vía civil, sendo o último en saltar aos titulares o emprendido pola SGAE contra Elrincondejesus.com, espazo web para o que a entidade de xestión de dereitos de autor pedía o peche cautelar, o que rexeitou o Auto Nº 138/09 do maxistrado Raúl N. García Orejudo, do Xulgado Mercantil nº 7 de Barcelona, no que se asegura que as redes de transmisión de datos entre usuarios de Internet non vulnera, en principio, dereito algún protexido pola Lei de Propiedade Intelectual.
O xuíz entendeu que a web de publicación de ligazóns de redes P2P (hospedada en servidores da compañía luguesa Redcoruna, S.L.U., empresa fóra do proceso como indica expresamente o maxistrado no seu auto) non realiza comunicación pública de obras nin ten ánimo de lucro, e incluso constante que o uso de redes P2P non vulneraría o Texto Refundido da Lei de Propiedade Intelectual, aínda que esta decisión xudicial non crea xurisprudencia e aínda cabe recurso de apelación contra a mesma.
De todos os xeitos, hai que lembrar que estamos a falar só da petición de medidas cautelares, e non do xuízo en si mesmo, polo que o capítulo final do proceso aínda está lonxe, aínda que o auto foi moi ben recibido pola comunidade internauta, xa que por fin un maxistrado demostra certa preocupación por comprender o funcionamento das redes P2P.