Voluntariado Dixital xa conta con 137 participantes e 36 entidades inscritas
martes, 20 de marzo do 2012
- Mar Pereira e Ovidio Rodeiro na posta en marcha do proceso formativo do programa
O Programa de Voluntariado Dixital,
dirixido a tirar proveito da
solidariedade galega no camiño da e-alfabetización, comezou xa o seu plan
formativo. A primeira xornada estase a celebrar
este martes 20 de marzo no Centro de Novas Tecnoloxías de Galicia, contando
coa presenza dos responsábeis dos departamentos autonómicos que fixeron posíbel
o programa e máis das persoas e entidades que xa están inscritas no mesmo coa
arela de compartir o seu coñecemento coa cidadanía. O módulo primeiro centrouse
na definición dos obxectivos e o alcance do devandito programa, que vén da man
da Secretaría Xeral de Modernización e a Dirección Xeral de Xuventude e
Voluntariado e que se encamiña, sobre todo, a loitar contra a exclusión dixital
de persoas maiores (buscándose chegar a 3.500 delas ao longo deste ano) e con
diversidades funcionais (abranguendo no mesmo período a oito federacións destes
colectivos).
A xornada foi inaugurada por Mar Pereira e Ovidio
Rodeiro, responsábeis de Modernización e Xuventude, que fixeron fincapé nas
cifras coas que arranca o proceso docente: 137 voluntarios dixitais e do
persoal técnico de 36 entidades adheridas. Tamén lles lembraron aos presentes
as tres forzas que xunta o programa para conseguir unha forza maior e de longo
alcance: solidariedade individual, responsabilidade social das empresas e
infraestruturas para dar cabida e canalizar a acción divulgativa.
Volvendo á liña formativa que comezou este 20
de marzo, dicir que incluirá até seis módulos cun total de 140 horas de
contidos, presenciais e en liña, a través das aulas da Rede CeMIT, un dos
piares, precisamente, do que será o desenvolvemento posterior do Programa. “Unha vez rematada a formación básica, na
segunda semana do mes de abril”, fixeron saber, “as persoas voluntarias poderán comezar a súa actividade, aínda que
recibirán formación continua até xuño”. En labores de coordinación, a
iniciativa contará coas achegas de VolDixital, encargándose de canalizar a
oferta de voluntarias e voluntarios e máis os requirimentos que realicen as
entidades voluntarias.
Responsabilidade social das empresas
Como dixemos, ademais
da solidariedade individual, súmase a responsabilidade social das empresas TIC
e organismos públicos e privados. Modernización e a Dirección Xeral de
Xuventude salientaron que, amais dos voluntarios e as entidades de voluntariado
xa se comprometeron a participar no programa un total de 12 organismos
colaboradores, que son institucións públicas e privadas cuxo papel é o de apoio
e soporte ao programa de maneira continua e duradeira. Arestora participan: do eido
universitario e formativo das persoas maiores, a Universidade Sénior (UDC), a
Asociación Cultural Galega de Formación permanente de adultos ATEGAL; do eido
asociativo das persoas maiores: a Federación Territorial de Asociacións de
Pensionistas e Xubilados UDP; do ámbito Asociativo Persoas con Discapacidade:
as oito entidades integradas na entidade CERMI Galicia - COGAMI, FADEMGA-FEAPS
Galicia, FAXPG, ONCE, FEAFES Galicia, DOWN Galicia, AUTISMO Galicia e FEGADACE;
e dos Colexios Profesionais, o Colexio de Enxeñeiros Informáticos de
Galicia.
Ademais, un total de
13 empresas tecnolóxicas xa manifestaron os seu compromiso e o seu apoio. Son
as seguintes: 3.14 Financial Contents, Bahía Software, Balidea, Ednon, Everis,
Igalia, INFOJC, Level Telecom, Plexus, Quobis, Tecnocom, Training Channel e
Visual Publinet S.L.
Infraestrutura de aulas públicas
O Programa de
Voluntariado Dixital nútrese dos centros e equipamentos dos que dispón a
Administración autonómica con capacidade para acubillar formación TIC. Ao seu
abeiro, póñense en xogo 98 centros da Rede de aulas CeMIT, as máis de 300
bibliotecas públicas, os 79 centros sociocomunitarios, os 81 centros CeDIM e
outros recursos que poñan á disposición do programa tanto os mecenas como as
entidades colaboradoras.
Obxectivos 2012
Segundo fixeron saber
Mar Pereira e Ovidio Rodeiro, os obxectivos para finais de ano son acadar a
colaboración de 200 voluntarios, 100 entidades colaboradoras, entre entidades
de acción voluntaria, empresas e outras entidades, e chegar a catro colectivos
en risco de exclusión dixital.
Convocatorias semestrais a través da web
O desenvolvemento do
programa divídense en dúas convocatorias, a primeira que se pechou o pasado 29
de febreiro, e unha segunda convocatoria que se lanza en setembro. Nesa data
repetirase o proceso e tanto as entidades de acción como os voluntarios poderán
incorporarse ao programa a través da web voluntariadodixital.xunta.es. A
adhesión das entidades públicas e privadas e as empresas realizarase a través
da sinatura dun convenio.