As grandes produtoras de animación de EE UU prefiren Linux

Unha boa parte da animación que se ve nas grandes pantallas foi cociñada con programas de software libre. Máis concretamente con Linux (segundo reflicte a Asociación de Usuarios de GNIX) que se usa para realizar a case totalidade dos produtos cinematográficos de casas como Disney/Pixar, DreamWorks ou Sony. Neste intre, o devandito programa de código aberto abrangue o 95% dos servidores de Hollywood. O motivo desta predilección pola fonte aberta non é outro que o factor económico, xa que, a fin de contas, non se pode negar que estas empresas tratan de facer o que calquera outra empresa dende que o mundo é mundo: reducir gastos para obter máis marxe de beneficios (e unha boa parte dos gastos virían, precisamente, da compra de licenzas de software pechado). Ademais, as grandes produtoras salientan a rapidez e a estabilidade de Linux. Iso non quere dicir que non se empreguen sistemas ou ferramentas Mac e Windows, que se aplican sobre todo en labores onde se traballa a menor escala.