Videoxogos de baile para evitar o sobrepeso na nenez

A obesidade infantil está aumentando en todo o mundo a pasos axigantados. Os expertos en saúde advirten da relación existente entre o estilo de vida que levamos e as doenzas do corazón e a diabetes, que poden acurtar drasticamente a esperanza de vida das xeracións máis novas. Estados Unidos é un dos países máis afectados por este problema e, de entre todos, o estado de Virxinia Occidental é o que peor leva o problema da obesidade dos cativos. Para pórlle fin a esta pandemia e loitar contra o sobrepeso dende os colexios, o goberno está ultimando un plan para empregar o xogo de Konami, Dance Dance Revolution como actividade extraescolar en cada unha das escolas públicas do estado, que evitará que os nenos leven unha vida sedentaria e pasiva nos seus fogares.