YouLike.TV, televisión por Internet made in Galicia

A empresa tecnolóxica galega LambdaStream vén de pór en funcionamento a primeira rede de TV por Internet en España, que distribúe un número ilimitado de servizos de televisión a través dun decodificador IP ou do ordenador. YouLike.TV, que así se fai chamar esta nova plataforma, vai encamiñada a ser o complemento ideal para a distribución da televisión (e radio) dixital terrestre (TDT) xa que chega a aquelas zonas non cubertas por ela e permite ós provedores distribuír os seus contidos, tanto en aberto como na modalidade de pago, sen necesidade dunha infraestrutura propia e para unha audiencia mundial. Esta mesma rede distribúe catro canles de televisión por Internet (canaldeportivo.tv, coruna.tv, mundosdigitales.tv e culleredo.tv) e ten previsto aumentar a súa oferta nos vindeiros meses. Con YouLike.TV, LambdaStream converteríase na primeira empresa tecnolóxica en realizar o outsourcing dunha rede de televisión por Internet, o que, a xuízo do director comercial da compañía, Jesús Fernández, “permite desenvolver novos modelos de negocio baseados en novas oportunidades publicitarias, en subscricións, micro-pagos por visión ou descarga, tenda en Internet e servizos de valor engadido, entre outros”. YouLike.TV é compatible ademais con todos os estándares e soporta todo tipo de protocolos (3GPP, TSolverIP, RTP, http, MMS…) tecnoloxías (Windows Media, Flash Media, Real, MP3, MP4…) e contidos (baseados na web, multimedia, arquivos xenéricos…). Esta empresa galega está acadando un gran éxito a escala nacional e xa prevé pór en funcionamento un ambicioso plan de desenvolvemento que se plasmará coa apertura de varias oficinas internacionais en Madrid, Rusia, Singapur e Oriente Próximo.