As Eleccións Municipais fixéronse notar na Internet galega

Remataron as eleccións municipais do domingo, e a esperas de que se fagan públicos os pactos que levarán adiante os gobernos de moitos concellos galegos, a Internet xa se está a converter nunha fonte de información e un lugar de debate sobre o asunto.
A meirande parte dos medios de comunicación galegos dedicaron especiais ó seguimento dos comicios, pero foi máis significativo o xeito no que se viviu a xornada a través dos blogs, pois tanto políticos como cidadáns foron compartindo as súas impresións, algo que non pasara en anteriores municipais (cando o fenómeno dos blogs aínda estaba emerxendo).
Un dos blogueiros que resultou máis relevante este domingo foi, sen dúbida, Iván Puentes, que trala súa traxectoria en Xuventudes Socialistas de Galicia estreouse na política presentándose coma candidato á alcaldía de Fene, obxectivo do que saíu vitorioso e que agradeceu dende o seu blog ó pouco de coñecerse os resultados electorais.

A estas horas centos de blogueiros xa deron as súas impresións sobre os resultados dos comicios, de xeito que hai quen critica que a campaña electoral se centrase nos partidos políticos estatais (e se esquecese o auténtico espírito municipal da consulta) e outros botan unha ollada con humor, mentres que algúns políticos usan os seus blogs de campaña para agradecer os apoios ou para recoñecer a súa derrota.
Trala revolución dos blogs na vida política, outro fenómeno chegou tamén ás campañas electorais, que foi o vídeo na Internet, e dende o BNG xa anuncian que gañaron tal batalla, xa que a canle do Bloque en YouTube superou en visitas ó do Partido Popular (o PSdeG non empregou tal plataforma como soporte das súas promocións de vídeo) pese a ter unha vida moito máis curta.
Agora só resta ver se todas estas ferramentas que achega a Rede continúan a contar co apoio dos políticos unha vez rematada a campaña, de xeito que as integren no seu xeito de relacionarse cos seus electores e administrados.