Emetel crea un sistema de mellora de comunicación para o Colexio Oficial de Arquitectos de Galicia

Emetel Sistemas, empresa galega especializada en enxeñería de redes e comunicacións, vén de desenvolver un sistema de mellora de comunicación para o Colexio Oficial de Arquitectos de Galicia que vai orientado a satisfacer as necesidades das súas novas infraestruturas. Segundo os seus creadores, “este proxecto era de vital importancia para o correcto funcionamento dos servizos que se veñen dispoñendo a través de Internet e das distintas Redes do COAG”.
Até o de agora, o COAG dispoñía dunha ampla variedade de servizos que ofrecía ós seus colexiados e usuarios (2.500 e preto de 2.000, respectivamente) mediante distintas alternativas de comunicación (vía web, extranet, correo ou intercambio de ficheiros por FTP), mais esta infraestrutura non abondaba e fíxose necesaria unha mellora no rendemento das redes do Colexio.
Agora, cun investimento de preto de 12.000 euros, o novo xestor de amplitude de banda controla os dous puntos críticos: a entrada das delegacións e o acceso a Internet; amais de distribuír de xeito racional a capacidade existente e de acadar maior velocidade, o que posibilita a realización de varias transferencias á vez.
Con este proxecto, o COAG complementa as súas ferramentas actuais e facilita o crecemento e a adaptación ás novas necesidades de comunicación do Colexio, mellorando asemade o día a día das súas sete delegacións en Galicia.