Máis de 250 expertos en contidos dixitais participarán na feira FICOD de Madrid

Co principal obxectivo de converterse nun referente a nivel nacional e internacional do sector das novas tecnoloxías, a Feira Internacional de Contidos Dixitais, FICOD, vai achegar a Madrid máis de 250 profesionais que debaterán sobre o futuro desta industria en España.
Ó longo dos días 6, 7 e 8 de novembro, FICOD, organizado polo Ministerio de Industria, Turismo e Comercio a través de Red.es, xorde co pulo de afianzarse como nexo de unión entre tódolos axentes implicados no sector (creadores, produtores, distribuidores, provedores de acceso, operadores de redes, fabricantes de terminais, consumidores…) “e servirá de base para crear unha industria sólida, competitiva e de calidade”, segundo informa a organización.
FICOD, que terá continuidade e periodicidade anual, vai celebrar a súa primeira edición no recinto feiral IFEMA de Madrid, onde coincidirá con SIMO, o salón anual da industria de Tecnoloxías da Información e as Comunicacións (TIC), e Broadcast, o encontro da industria da tecnoloxía e o equipamento profesional para a industria audiovisual.
En total, FICOD acollerá a máis de 250 expertos, distribuídos en coloquios, mesas de debate, xornadas de networking, obradoiros e conferencias variadas.
Tódalas actividades que se desenvolverán en FICOD poderán seguirse en director a través da web www.ficod2007.es e do blog www.ficod2007.es/blog.