A USC organiza o Concurso de Ideas Empresariais Innovadoras para universitarios galegos

A Universidade de Santiago de Compostela vén de anunciar a celebración do VIII Concurso de Ideas Empresarias Innovadoras que, un ano máis, vai premiar a aqueles emprendedores que presenten ideas innovadoras susceptibles de converterse en proxectos empresariais a curto e medio prazo.
O devandito certame vai dirixido a tódolos membros da comunidade universitaria (estudantes, titulados, doutorados) a e tódalas áreas de coñecemento de calquera das universidades galegas.
Para participar, os interesados deberán realizar a inscrición a través dun formulario que se atopa na páxina web de Uniemprende ou ben achegándose persoalmente a calquera dos rexistros existentes nos campus de Santiago e Lugo (Rexistro do Centro de Innovación e Transferencia de Tecnoloxía, Rexistro da Reitoría ou Rexistro dos Servizos Centrais do Campus de Lugo) dirixindo o formulario á Vicerreitoría de Investigación e Innovación.
O prazo de presentación das ideas (que está aberto dende o pasado 15 de outubro), permanecerá operativo ata o vindeiro 30 de novembro ás 14:00 horas.
A USC outorgará 5 premios de 600 euros (con independencia do número de participantes) ás ideas máis viables, máis innovadoras e que mellor teñan en conta as políticas de igualdade, podendo quedar deserto no caso de que as ideas non reúnan as condicións necesarias para seren premiadas.