Case a metade dos internautas se procuran a si mesmos na Rede

Segundo un estudo que vén de publicar a empresa Pew Internet and American Life Project, “o 47 por cento dos estadounidenses buscan información sobre si mesmos en algún tipo de buscador en Internet”. O devandito informe asegura que en cinco anos a cifra de usuarios de Internet que adoitan a levar a cabo esta peculiar manobra de autodocumentación incrementouse máis do dobre, xa que nesa data mantíñase nun 22 por cento o número de internautas que se procuraban a si mesmos na Rede.
Pero o máis curioso destes usuarios que traban no seu propio anzol é que non amosan preocupación polos datos dispoñible sobre eles, aínda que s existe un certo desacougo por cómo se poden empregar eses datos posteriormente.
No relativo á procura de información relativa ás persoas do entorno, un 53 por cento dos enquisados recoñece telo feito nalgunha ocasión, na maioría dos casos, “para atopar a alguén co que se perdeu o contacto”.
Os usuarios que teñen curiosidade por buscarse na Rede obteñen, en termos xerais, resultados insignificantes, aínda que ás veces téñense dado casos de seren reconducidos ata arquivos públicos onde poden saír á luz desagradables situacións como casos de bancarrota ou procesos de divorcio.
A maior parte dos enquisados aseguran non ter atopado información embarazosa na Rede sobre eles (compre sinalar que non enquisaron nin a Britney Spears nin á filla do multimillonario dono dos hoteis Hilton, porque do contrario cambiarían as cifras substancialmente); apenas un 4 por cento consideran que a información acerca deles é imprecisa ou vergoñenta.