Dende que, en xuño de 2005, entrou en vigor a normativa que establecía o novo Plan Nacional de Nomes de Dominio de Internet baixo o código de país correspondente a España, “.es”, este dominio non deixou de adquirir notoriedade e de medrar na Rede.
Tanto é así que os internautas españois que deciden (e teñen tempo abondo) para crear a súa propia web, escollen o dominio “.es” antes cós recorridos “.com”, “.org” ou “.net”, usados de xeito maioritario ata o de agora no Estado.
Segundo datos ofrecidos por Red.es, a entidade do Ministerio de Industria que ten encomendada a xestión do “.es”, este dominio ten un 43 por cento de dominios rexistrados en España, un punto por enriba do dominio “.com” que conta cun 42 por cento de rexistros no Estado.
As cifras que achega Red.es establecen en 895.327 os dominios totais “.es” rexistrados ó peche de 2007 fronte ós 797.000 dominios “.com” contabilizados en España durante o mesmo exercicio. Nun terceiro posto sitúase a certa distancia os dominios “.net” con preto de 128.000 titulares españois.
Notable incremento nas últimas 48 horas
O Ministerio de Industria, Turismo e Comercio vén de pór en funcionamento o programa Jóvenes en Red para afianzar a presenza en Internet entre os cidadáns e cidadás de ata 30 anos. Nas primeiras 48 horas, a web da entidade, Red.es, xa recibiu 7.246 solicitudes de dominios “.es”, cifra que practicamente triplica o número das que se viñan contabilizando nunha xornada normal.
