Duke Nukem Forever volve ser considerado por Wired coma o Vaporware do Ano

A revista Wired leva 11 anos pechando o mes de decembro cunha selección do Vaporware do Ano, eses produtos anunciados que non chegan a facerse realidade, e que en moitos casos nunca ven a luz, aínda que non esquecen citar o feito de que o disco Chinese Democracy de Guns’n’Roses lanzouse finamente (tras uns 9 anos de rumores) como un exemplo de que non todo o que se demora queda no esquecemento.
No 10º posto da listaxe de Wired está o PlayStation Home, que xa está dispoñible en versión de proba, pero Sony prometera o produto final para este ano (e vénse a falar desta plataforma virtual dende marzo de 2007, polo que é decepcionante que moitas das prestacións prometidas aínda estean en preparación); Myka, a set-top box cun cliente de BitTorrent leva aceptando reservas dende o pasado mes de marzo, sen que o produto chegue aos consumidores, de aí que se gañe unha novena posición; o segue Hero’s Journey, un xogo do que se fala dende o E3 de 2005; o ZAP-X, que debería ter saído este ano (e estaría demorado ata 2010) sería un vehículo deportivo eléctrico que conseguiría un consumo realmente reducido e chegaría a velocidades de 250 quilómetros por hora; o picoproxector de Microvision Pico P, que se anunciou hai case un ano no CES de Las Vegas e segue sen chegar ás tendas; o móbil/GPS de Garmin nüvifone, anunciado para o terceiro trimestre de 2008 e demorado á primeira metade de 2009; o agardado xogo StarCraft II (en desenvolvemento dende 2003 e previsto para 2008); máis móbiles co sistema operativo Android aparte do T-Mobile G1 (que parece que chegarán en 2009); o Internet Explorer 8; e, finalmente, o clásico entre os clásicos, un xogo que xa apareceu na listaxe de Wired en 2000, 2001, 2002, 2003, 2005, 2006 e 2007, e que continúa a figurar en cabeza: Duke Nukem Forever.
O xogo incluso conta cun teaser dende hai un ano, nos últimos días publicouse do mesmo unha imaxe que non deixa de ser arte conceptual, e pese a que se comezou a desenvolver en 1997, continúa sen verse ningunha imaxe deste título en acción, converténdose no vaporware por excelencia.

Vello vídeo de adianto do xogo Duke Nukem Forever