Ferrol-Ortegal estrea unha televisión IP de promoción turística

A sala de actos do stand de Galicia en FITUR acolleu esta maña unha presentación organizada polo Plan de Dinamización de Produto Turístico de Ferrol-Ortegal, que contou coa presentadora de televisión ferrolá Paula Vázquez como mestra de cerimonias, quen inaugurou a Televisión IP Ferrol-Ortegal, que pretende ser unha fiestra ao mundo que permite amosar distintos contidos que sirvan para promover a zona de Ferrol-Ortegal coma destino turístico incluso en tempadas distintas da estival.
Ata o momento esta nova páxina web presenta 9 vídeos repartidos en 4 categorías (institucional, deportes na natureza, cultura, gastronomía e etnoloxía) que están programados para a súa reprodución automática coma se fose unha canle de televisión temática, aínda que tamén permite a súa visualización á carta. Os clips de vídeo están en formato Quicktime cunha resolución de 512 x 384 píxeles, o que sería comparable ás emisións de televisión tradicional.
Esta nova canle preséntase como a primeira televisión en Internet con contido esencialmente turístico, e parece unha plataforma axeitada para dar a coñecer a oferta de produtos turísticos da rexión galega que aproveitou o FITUR 2009 para chegar a un público moi amplo.