A Internet facilitou o seguimento da gala de entrega dos Oscars en directo

A pasada noite foi un éxito para o cine español, por recibir Penélope Cruz un Óscar pola súa interpretación na película Vicky Cristina Barcelona, pero para moitos espectadores supuxo un antes e un despois, pois ante a imposibilidade de poder seguir o evento por televisión de non ter contratado Canal+ (que actualmente só se recibe a través de Digital+) non foron poucos os que, como xa facían para seguir encontros deportivos, tiraron da Rede para poder ver en directo a gala de entrega dos Oscars, o que se podía facer tanto a través de aplicacións de vídeo en directo baseadas en P2P como a través de distintas páxinas web que servían o sinal de televisións norteamericanas e sudamericanas, sendo relativamente doado atopar estas emisións.
Como xa pasou coa toma de posesión de Barack H. Obama, moitas foron as plataformas televisivas que quixeron apostar pola Internet para instar aos seus espectadores a participar en chats para compartir as súas opinións sobre a gala como para participar en porras e concursos, pero o feito de que non fose preciso ter contratada algunha das canles de televisión que emitían en exclusiva para o seu país o certame, podería supor a posta en dúbida dese modelo de explotación audiovisual. ¿De qué serve que un evento só se poida seguir tradicionalmente a través dunha canle de pago cando existen alternativas de balde? ¿Non deberían emitir este tipo de certames en canles en aberto agora que na TDT sobre espazo para contidos?