Televisión Española contará cunha nova canle de contidos culturais

O ministro de Cultura, César Antonio Molina, presentou onte Cultural·es, unha nova canle de TVE dedicada en exclusiva á potenciación, pulo e difusión da cultura española, para o que contará co apoio do Ministerio de Cultura e o Instituto Nacional das Artes Escénicas e das Música (INAEM).
A nova canle estará dirixida por Pere Roca e comezará a emitir en probas a partir de abril de 2009 a través de satélite e cable, integrándose na oferta da TDT tras o apagamento analóxico en abril de 2010.
O presidente da Corporación de RTVE, Luis Fernández, asegurou que «Cultural·es reafirma o noso sinal de identidade: unha televisión pública feita por e para os cidadáns». A programación da canle contará con 4 áreas fundamentais: as artes, as ciencias e as letras; a cidadanía e a civilización; a memoria e o patrimonio; e as industrias culturais.
O anuncio da nova cale contou coa presenza do cociñeiro Ferrán Adrià como padriño, nome ao que se sumarán nos vindeiros meses distintas personalidades da cultura, a arte e a ciencia para constituír un comité de valedores de España e Iberoamérica que serán embaixadores culturais.
O nome da canle tamén é algo que resulta rechamante, especialmente porque o dominio de Internet Cultural.es corresponde a unha sociedade limitada valenciana, o que dificultará a presenza en liña do novo medio (que supomos que estará integrado na web oficial de RTVE).

Vídeo promocional da nova canle