Seis empresas galegas acoden á feira Cartoon Movie cos seus produtos de animación

O meirande encontro europeo de animación da tempada, o Cartoon Movie, contará nesta súa nova convocatoria cunha ampla representación da industria galega. Así nolo fai saber o Clúster Audiovisual Galego, que se despraza hoxe mesmo a Lyon para asistir á edición número 11 da devandita feira, un encontro de portas abertas ata o 6 de marzo onde se espera dar acubillo aos principais produtores e distribuidores do continente e ás grandes innovacións tecnolóxicas do momento. A achega galega do CLAG, representada polas empresas Abano Producións, Bren Entertainment, Ficción, Continental, Dygra Films e Perro Verde Films, acode coa arela de reforzar a súa presenza no mercado continental a través (principalmente) da ampliación da axenda de contactos. Máis polo miúdo, o obxectivo é tirar proveito de dous grandes factores: por unha banda o elevado número de responsables de financiamento, produtores e distribuidores reunidos baixo un mesto teito, e pola outra, a traxectoria mesma da feira, obradoiro de financiamentos en si mesmo (ao longo das súas dez primeiras edicións acadou apoios para 123 filmes e un volume de negocio de 800 millóns de euros).
Por certo que unha das produtoras, Perro Verde Films, acode cun especial recoñecemento previo: foi nomeada aos premios Cartoon Movie Tributes 2008 pola longametraxe de animación O lince perdido.
Dygra Films, pola súa parte, presentará no mercado Holly Night!, Continental fará o propio cos seus proxectos de animación máis recentes entre os que se atopa A flor máis grande do mundo, e Bren dará conta dos detalles do seus novos tres proxectos fílmicos arestora en fase de desenvolvemento: Cracks, Copito de neve e un terceiro sobre o Camiño de Santiago. Polo que respecta a Abano, a súa arela é establecer contactos de promoción en Lyon para darlle o máximo pulo á súa nova película en 3D, A tropa de trapo, e máis ao filme para nenos Cóntame un conto.
Ficción Producciones, pola súa banda, acode ao mercado con dúas producións de animación: A pequena serea, onde se mestura animación con imaxe real, e unha curtametraxe de 10 minutos de duración, A pequena gran aventura, en fase de desenvolvemento e realizada con técnica estereoscópica.