Fíltrase a listaxe negra de webs que o goberno de Australia nunca che deixaría visitar

A listaxe da listaxe de negra. Da man de Wikileaks e pola vía de 20 Minutos está a chegar a todos os recantos da Rede a clasificación de todas aquelas páxinas web que o Goberno australiano prohibe entre os internautas que residen no país. Como era de agardar e tendo en conta a tradicional tendencia das autoridades deste país a buscar demos onde non os hai, na listaxe en cuestión hai unha especie de ensalada web onde colle de todo: dende o directamente negativo e ofensivo ata páxinas web con contidos de un nivel de violencia equiparable (e xa que estamos en Australia) ao despregado por un koala común. Entre os primeiros: páxinas e máis páxinas sobre crimes, violencia ou abusos, webs que, a verdade sexa dita, probablemente non contribúan en nada a facer un mundo mellor. Entre os segundos é moi posible que tampouco haxa webs dirixidas a tal fin, pero non deixa de chocar que na listaxe negra haxa operadores turísticos ou incluso un dentista.
Segundo informa Wikileaks (vía Barrapunto), trátase dunha clasificación segreda que non só incorpora material ilegal, senón outros tipos de contidos non desexados.
A finalidade da relación de espazos en liña era a de atopar acubillo e distribución entre provedores de Internet para incluír as devanditas webs nos seus filtros de seguridade e bloquear así o acceso aos ditos sitios.
Como era de agardar, o Goberno daquel país xa procedeu a negar a súa responsabilidade sobre o devandito documento. Con todo, o escándalo está servido: tanto para a cidadanía, que ve como o proceso non responde totalmente a intereses obxectivos (hai no panorama Web millóns de páxinas moito máis prexudiciais cá dun dentista), como para as propias autoridades australianas, que consideran unha irresponsabilidade que se teña filtrado a clasificación.
Asemade, Wikileaks tamén ten motivos para o balbordo: logo de que se dese a coñecer o documento, viu como eran bloqueadas varias páxinas propias de seu ata quedar definitivamente fóra de liña. Por certo que a organización Reporteiros sen Fronteiras inclúe a Australia na súa propia listaxe dos doce inimigos principais de Internet.