Un terzo dos internautas botan man da mesma clave para todas as portas da Rede

Ben sexa por puro desleixo, por exceso de despreocupación ou simplemente porque non damos para máis, pero a verdade é que a historia de Internet non brilla especialmente no que se refire á elección dos contrasinais cos que decote accedemos aos diferentes servizos da Internet. En moitos casos, a cousa é ben sinxela: se o/a internauta convive cun animal, dispáranse as posibilidades de que a clave elixida para que se erga o muro que afasta aos demais dos seus segredos sexa precisamente o nome dese animal. Pero aínda podemos dar un paso máis e ser aínda máis exhaustivos: segundo un estudo de Sophos do que se fai eco estes días Elpais.es, arredor dun terzo dos usuarios desta cousa chamada Internet teñen a mesma clave para todos os seus accesos a Internet. Ademais, unha boa parte deles optan por protexer os seus datos e servizos personalizados por unha solución tan obvia, que case se podería dicir que é tremendamente complexa: os primeiros catro números da táboa.
A estratexia, nalgúns casos froito do desleixo e noutros dun exceso á hora de consumir filmes de espionaxe (haberá quen vexa unha gran idea deixar aberta a porta da casa para despistar ao ladrón), tenlle saído caro a máis de un internauta, algún tan importante –aínda que non precisamente por optar polo código 1234- como o presidente dos Estados Unidos, Barack Obama, que durante a achega dos datos persoais para entrar a formar parte do club Twitter subministrou a través do seu equipo técnico a versión inglesa do termo ledicia, probablemente a palabra que máis se repite nos manuais de autoaxuda para presidentes dun país.
A cousa tivo continuidade: quen lle roubou a clave pasou unhas cantas horas (agora si) de ledicia grazas ao privilexio de enviar correos no seu nome. O caso de Paris Hilton, prosegue Elpais.es na súa reportaxe, tamén ten delito: as preguntas de seguridade que escolleu para recuperar os contrasinais do seu correo, en T-Mobile e Yahoo!, eran tan doadas que só era preciso unha pequena procura en Google para atopar a resposta. Por certo que fóra do devandito achado da secuencia numérica, os internautas non adoitan a optar por alternativas moito mellores: o 16% emprega o propio nome ou o dos familiares directos, o 5% nomes de series ou filmes ou a propia palabra password para o 4%. Na imaxe, unha ollada a un terreo común: o teclado de Johne1981 no Flickr.