Novidades de interactividade na rede social galega Cabozo.com

A comunidade internauta galega, malia os atrancos postos no seu camiño (escaseza de servizo de acceso á Rede, prezos elevados, falta de interese por parte das empresas e das institucións, etc), ten amosado en repetidas ocasións un bo entendemento coas faces da Web máis participativas e sociais. Exemplos disto son as fondas raizames do colectivo blogueiro galego (blogomillo), ou o ben que lle acaen servizos como Facebook á nosa condición de veciñanza espallada polo mundo (favorecendo esa Galiza mundial da que tanto se fala). Se cadra o que faltaba era unha ferramenta que compartindo algunhas das características do Facebook constituíse a nosa contribución ao panorama actual de redes sociais de amizade. Algo disto e máis hai en Cabozo.com, unha web que foi concibida hai máis ou menos un ano por un galego emigrado en Alemaña (Antonio Mariño) e que, tal como reflicte Vieiros nun completo repaso pola súa traxectoria, vén de superar hai pouco a liña dos 500 usuarios e usuarias rexistrados/as. Por certo que La Voz tamén deu conta o pasado mes de marzo das principais achegas desta proposta en liña.
O servizo, malia compartir algunhas das súas funcións con outras coñecidas propostas 2.0, ten unha serie de peculiaridades que poñen distancia con Facebook e compaña. Para comezar, é galega e, en troques de comezar como un gran negocio para unha chea de colectivos espallados por todo o mundo, púxose en marcha como algo pequeno e para unir a xente vinculada a Viveiro. O problema, ou a vantaxe, é que as visitas e as inscricións non paran de medrar, ao igual que as solicitudes de novos recursos a engadir aos xa operativos, como por exemplo a posta en marcha de grupos públicos ou privados. Segundo informa Vieiros, o servizo está a dar pasos firmes cara unhas condicións máis plenas de interactividade, incluíndo un taboleiro para deixar mensaxes a outros usuarios e un apartado de perfiles estendidos onde poderemos incorporar información detallada sobre o lugar onde vivimos ou os nosos gustos e tendencias persoais (por certo que a achega desta información apoiarase en boa medida no uso de vídeos que poderán ser visualizados mentres os internautas dan conta dos nosos datos persoais).