Denuncian homofobia por parte de Amazon

A aparición de produtos nas listaxes dos máis vendidos ou recomendados en tendas virtuais (así como tamén a súa aparición nos resultados de busca) é crucial para o seu éxito, polo que é de entender o malestar dos autores de libros de temática homosexual ante o escándalo que se desatou durante os últimos días ante a presunta homofobia de Amazon, que fixo desaparecer os libros de temática gay baixo a desculpa de que correspondían a material para adultos, o que curiosamente non se aplica cando os contidos sexuais son heterosexuais (coma no caso de biografías de actores porno).
Dende Amazon aseguran que esta incidencia está provocada por un fallo que procurarán arranxar, pero iso resulta difícil de crer, o que levou incluso a organizar unha recollida de sinaturas en protesta que xa conta con milleiros de adhesións.