Os voluntarios poderán axudar ao espallamento da TDT

Ante a proximidade do apagamento dixital, o Goberno está a emprender distintas iniciativas que dean a coñecer o que suporá o salto definitivo á TDT, entre as que sorprende o proxecto Voluntarios TDT, un servizo no que as persoas interesadas en colaborar poderán axudar a difundir o que é a Televisión Dixital Terrestre e mesmo axudar á instalación de receptores da mesma principalmente a cidadáns con risco de exclusión social (coma persoas dependentes, xubilados e pensionistas).
Para compensar aos cidadáns que se ofrezan a colaborar facilitaranse vantaxes como a convalidación de créditos universitarios ou horas de prácticas (CFGS/FP), billetes de transporte local de balde durante a duración da campaña, entrada de balde a polideportivos e piscinas municipais, certificado do Colexio Oficial de Enxeñeiros Técnicos de Telecomunicación conforme se superou o período de formación e realizaron as accións de voluntariado (para poder incorporalos aos seus currículos), prioridade na asistencia coma público a programas de televisión de canles pertencentes á plataforma Impulsa TDT, visitas técnicas a centros emisores locais (coa posibilidade de deixar currículos nos mesmos, ou nos departamentos de Recursos Humanos das canles de Impulsa TDT) e un agasallo de recordo ao remate da labor de voluntariado.