YouTube senta os alicerces do seu futuro: unha televisión oficial con contidos das grandes compañías

A competencia no panorama actual da Rede participativa está que arde, feito que entre outras cousas obríganos aos internautas a facer máis esforzos por separar o gran da palla (non é ouro todo o que reloce) e ás empresas a desbaratar ese traballo pola nosa parte. E como fan? Pois en liñas xerais renovándose a si mesmas día si e día tamén, anunciándoo con altofalantes. Neste panorama de actualización e medre de contidos e servizos, a web de YouTube semella ser unha das más activas. Segundo vén de dar a coñecer, o portal está a sentar os alicerces para converterse nunha plataforma con canles de televisión e películas logo dun acordo de colaboración con Sony, CBS e MGM, tres das firmas do audiovisual que, xuntas e por separado, máis produción comercial abranguen. A medida do servizo YouTube, que xa está avanzada e ao alcance da man dos internautas en EE UU (e de balde), forma parte dun novo vieiro asumido polo portal de vídeos propiedade de Google: a liña de reorientación da súa achega co fin de ser máis rendible. Isto, entre outras consecuencias, supón en certa medida a oficialización de YouTube, que amais de asinar pactos coas tres ditas firmas, fíxoo con outras dez máis.
Para que se entenda: a sinatura coas devanditas tres majors da industria audiovisual terá que achegar por forza un protagonismo dos seus produtos (filmes, series, programas) en detrimento (porque algo terá que ficar en segundo plano) do que ata o de agora era o miolo de YouTube: os vídeos feitos polos internautas de a pé.
A nova achega de YouTube, á que se poderá acceder a través dos contidos Premium, prevé en definitiva darlle forma completa aos alicerces dunha televisión máis ao uso, con diferentes canles en liña e máis opcións de apercibir ingresos por publicidade. Amais, o que se pretende con este e outros acordos que de seguro están por vir é soterrar a machada de guerra co sector da gran industria, ata o de agora un pouco amolada co feito de que o portal YouTube fose por libre e cometendo o sacrilexio de favorecer a participación activa e en primeira liña dos usuarios finais da Rede, subindo vídeos propios e alleos e sen facer seguimento estrito das licenzas de propiedade intelectual.