Microsoft anuncia a súa primeira caída de beneficios dos últimos 23 anos

Microsoft presentou onte os seus resultados económicos correspondentes ao terceiro trimestre fiscal (que remata o 31 de marzo) cuns ingresos de 13,650 millóns de dólares, o que suporía un descenso interanual do 6%, o que sería a primeira caída neste concepto dos últimos 23 anos, aínda que mantendo uns sólidos resultados operativos que se diluirían nuns beneficios de 0,33 dólares por acción.
Esta caída de ingresos sería consecuencia do descenso de vendas no mercado dos ordenadores persoais e os servidores, pois os ingresos por clientes corporativos permaneceron estables durante o último trimestre fiscal.
Nos últimos meses a compañía de Redmond tomou medidas ante a situación económica global, co recortes de gasto e optimización de recursos, sen deixar de lado o investimento en investigación e desenvolvemento, do que xa agardan obter réditos para o ano que vén, pois os lanzamentos de Windows 7, Office 2010 e Windows Mobile 6.5 deberían revitalizar os ingresos de Microsoft.
Por outra banda, a división de videoxogos incrementou os seus ingresos un 16%, en boa medida pola boa resposta do público ante a Xbox 360 (con 1,7 millóns de unidades distribuídas), consola de altas prestacións que é a máis barata da nova xeración.