Portugal dá comezo ás primeiras fases do apagamento analóxico

Portugal vai ao seu ritmo no cambo da tecnoloxía analóxica pola dixital en materia de televisión, tanto que case de podería dicir que o país irmán vai un par de corpos por detrás na carreira a prol da implantación da TDT. En boa medida, do que se trata é dunha medida voluntaria do Goberno, que retrasou a data de desconexión analóxica ata 2012 para, con case total probabilidade, non poñer o tellado antes cós alicerces. Dito doutro xeito: a situación tecnolóxica de Portugal require doutras iniciativas con maior urxencia. Segundo se sinala en Silicon News e en medios como Vnunet, o feito de adiar o paso dunha tecnoloxía a outra posibilitaralles aos nosos irmáns meirande marxe para unha máis axeitada implantación da TDT.
As previsións de Portugal Telecom, a principal operadora do país, son de que a cobertura dixital chegue ao 80% do territorio antes de que remate 2009 (sendo os prognósticos de España os de acadar porcentaxes próximas ao 100%). Portugal, que deu comezo hoxe mesmo ás primeiras etapas do apagamento, non semella salientar positivamente en materia de prezos por descodificador, oscilando arestora unha boa parte da oferta entre os 50 e os 150 euros, un custe que nin sequera está ao alcance dos petos do groso da cidadanía dos países máis ricos do continente, polo que case é de agardar que unha boa parte da sociedade do país irmán tamén aposte por adiar o chimpo á TDT. Con todo, o proceso xa comezou, e a día de hoxe aplicouse o apagamento en dez localidades do país, entre as que se atopan os arquipélagos de Açores e Madeira.