O grupo en Facebook a prol da Torre de Hércules xa ten máis de 6.000 membros

A Torre de Hércules da Coruña ten na Rede cada vez máis apoios para converterse en Patrimonio da Humanidade. Como por exemplo os do grupo aberto en Facebook en apoio da devandita súa candidatura para obter o nomeamento, un colectivo que a día de hoxe está integrado por máis de 6.000 internautas (e segue a medrar) e que fan fronte común con diversas actividades de divulgación na Rede, sobre todo de procura de novos apoios. Por certo que o grupo aberto na devandita rede social a prol da Torre coruñesa, o faro romano en activo máis antigo, está a atopar estes días ampla repercusión entre os medios locais da cidade: na Huella Digital ou Coruña Online (onde se anima a participar na iniciativa) e en cadernos persoais como o de Bus Urbano ou o do Barrio dos Rosais.
A idea dos responsables da proposta é tirar o máximo partido do poder de convocatoria e reunión das redes sociais de Internet (nas que están presentes xa a maior parte dos usuarios das novas tecnoloxías) para poñer todos os apoios posibles do lado da Torre.