Vigo terá Internet de balde a partir de xullo

A web La Vida Wifi segue a dar conta de iniciativas galegas a prol de poñer a Rede no aire, ao alcance da cidadanía, sendo a nosa terra un dos espazos onde a xuízo da páxina máis se está a facer a prol da promoción da Internet sen fíos (tal como se reflicte tamén no Informe WiFi 2008 do Grupo GOWEX). O caso máis recente dos valorados polo dito espazo en liña: a cidade de Vigo, onde xa está en marcha un tecido de tres redes para levar cobertura aos veciños e aos turistas de tres grandes áreas: O Calvario, a Praza de América e Independencia. Segundo recolle a web facéndose eco de informacións do Faro de Vigo, a idea é que o equipamento estea operativo en xullo, de xeito gratuíto pero con algunha que outra restrición que garanta a legalidade da iniciativa e o respecto por parte do Concello das normas de competencia (as administracións públicas non poden concorrer en España no mercado da Rede e con arela de lucro). Destes xeito, o sinal estará limitado ao pé de rúa (non chegará a dentro das casas) e unicamente poderá empregarse o servizo durante un tempo limitado que aínda está por concretar.
Amais disto, non estará dispoñible para a libre descarga de películas, cancións ou xogos, nin para visitar contidos vinculados ao sexo e á violencia ou non axeitados para os pequenos.
Segundo se informa na Internet, o proxecto vigués segue en certa maneira o ronsel da Rede WiFi de Barcelona. Amais destes e outros modelos, a iniciativa galega tamén está en disposición de inspirarse en si mesma, e máis se temos en conta que non é a primeira vez que Vigo impulsa un servizo desta índole, de balde e para toda a veciñanza, sendo o caso da cobertura sen fíos para a praia de Samil un dos máis salientables, malia a súa baixa demanda. Porén, tanto a tecnoloxía como o interese da cidadanía evolucionou moito dende aquela, por iso a previsión xeral no que se refire a interese suscitado é ben distinta. Para comezar, a nova rede non se limitará a un espazo non urbano, senón todo o contrario: estará no miolo da cidade, alí onde se desenvolve unha boa parte da súa vida cultural, social e económica, polo que é de supoñer un importante número de solicitudes de alta. Cómpre sinalar a maiores que a infraestrutura está suxeita a medres: en breve, logo de verán, o Concello levaraa ata a zona vella, aínda que desta volta con tecnoloxía WiMAX.