A USC dá a coñecer os nomes dos premiados no Concurso de Proxectos Empresariais Innovadores

A Universidade de Santiago (USC) vén de dar a coñecer os nomes das empresas recoñecidas no seu Concurso de Proxectos Empresariais Innovadores, un certame que xa vai pola novena edición e que se dirixe, como o seu propio nome indica, a salientar as iniciativas xurdidas ao abeiro da USC que máis proxección de futuro presentan e máis liñas distintivas de estratexia. O concurso, que sempre xira arredor das novas tecnoloxías da información como base total ou parcial das empresas que participan, recoñeceu este ano as achegas de AMSlab, laboratorio de análises químicos para o desenvolvemento de servizos que precisen alta tecnoloxía e alto nivel científico.
A empresa, que tamén ofrece consultoría e asesoría técnica para proxectos de I+D, recibiu o primeiro premio desta edición do certame, o que se traduce basicamente nun apoio de 9.000 euros e nun financiamento de 24.000.
A firma recibiu o seu galardón nun acto celebrado este martes no Colexio de San Xerome e no que as outras empresas recoñecidas foron Nanoimmunotech, co segundo premio de base tecnolóxica; Minichic, premio Empresa Xove; Peloides Termales, na modalidade de Muller Emprendedora; Enerxía e Cooperación, premio Proxecto Medioambiental; e Holística, Consultora para a Lusofonía, na categoría de Proxecto con Sensibilidade Social
A entrega de premios contou coa asistencia do reitor da USC, Senén Barro, que estivo acompañado do vicerreitor de Comunidade Universitaria e Compromiso Social, Xosé M. Mayán Santos; o director xeral de Promoción do Emprego, Andrés Hermida Trastoy; o subdirector xeral de Xestión do PGIDIT, Benito Fernández Rodríguez; e o xerente de Uninova, Gustavo Marcos.