Keteke non logra facerse un sitio entre as plataformas de redes sociais españolas

Á vista do éxito de Tuenti e Facebook, o pasado novembro Telefónica decidiu apostar forte polas redes sociais co lanzamento de Keteke, o que visto en perspectiva foi un rotundo fracaso, xa que tras investir 10 millóns de euros nunha importante campaña publicitaria con presenza televisiva e materializada na visita de Paris Hilton a España, pechou maio con 133.000 usuarios únicos cun tempo medio de conexión inferior aos 3 minutos, o que podería estar ben para un medio máis tradicional, pero para unha plataforma de redes sociais é un resultado nefasto, xa que ten que compararse con competidores que si que saben enganchar aos seus usuarios.
Entrando en comparacións, se miramos o número de páxinas vistas por persoa, Keteke ten unha media de 4 (cun máximo de 7 en xaneiro) mentres que a mesma empresa de medición de audiencias fala de 653 páxinas vistas por persoa en Tuenti, o que ilustra claramente que a iniciativa de Telefónica non conseguiu achegarse aos seus obxectivos iniciais, posiblemente por intentar entrar nun sector no que os usuarios xa tiñan as súas redes sociais tecidas en plataformas consolidadas, e dificilmente cambiarían de servizo por unha mera campaña publicitaria.