O Proxecto Natal converterase en realidade en novembro

O Proxecto Natal que introducirá a detección de movemento na Xbox 360 e que Microsoft anunciou no pasado E3 segue de actualidade no CES de Las Vegas, evento no que a compañía de Redmond incidiu no seu revolucionario sistema de control e confirmou que o accesorio para a súa consola (consistente nunha cámara que detecta a posición do usuario e un micrófono para recoñecer a súa voz) chegará ao mercado no mes de novembro, de xeito que chegaría a tempo para a campaña de Nadal.
Robbie Bach, o presidente da división de lecer de Microsoft foi o encargado de facer de Natal en Las Vegas, e chegou a asegurar que grazas a este proxecto 2010 será o «ano máis grande na historia da Xbox», pois o feito de que o xogador poida utilizar o seu corpo para manexar a consola vai ser toda unha revolución. Tamén contribuirán a este éxito novos títulos exclusivos coma Halo Reach ou o longamente agardado Alan Wake.