Prosperan os trámites para a creación dunha Comisión contra as páxinas web de descargas

O Consello de Ministros revisou este venres o anteproxecto de Lei de Economía Sustentable no que inclúen medidas contra a piratería na Internet nunha disposición adicional que causou moito rebumbio, o que non impediu que o texto continuase adiante mantendo a creación da Comisión de Propiedade Intelectual dependente do Ministerio de Cultura, que sería o que recibiría denuncias contra páxinas web de descargas e actuaría contra as mesmas, primeiro apercibindo aos seus propietarios e, no caso da non retirada dos contidos, acudindo aos xulgados centrais do Contencioso administrativo da Audiencia Nacional para decidir nun máximo de 4 días se o bloqueo dos contidos denunciados supón unha vulneración de dereitos fundamentais.
Aínda faltan bastantes pasos para a aprobación destas medidas, das que non se coñecerán detalles como a súa actual formulación ata o luns, e que agardan a súa tradución en Lei en febreiro de xeito que entre en vigor no verán.
A ministra de Cultura, Ángeles González-Sinde, compareceu ante a prensa para asegurar que están a facer «unha proposta equilibrada» que pretende harmonizar os dereitos «dos cidadáns como usuarios da Rede e de quen vive da cultura», afirmación non compartida por moitos usuarios moi activos ana Internet, que consideran que hai moitas ambigüidades no que pretende aprobar o Goberno, e incluso critican que os dereitos de autor estean protexidos por unha Comisión que goza dun procedemento exprés mentres que os maltratos, os impagamentos de pensións, o acaso laboral e moitos outros temas teñen que padecer os lentos procesos xudiciais (os que tamén deberán someterse posteriormente as páxinas web que non estean conformes co bloqueo aos seus contidos).