Telefónica quere entrar no negocio dos libros electrónicos ampliando as súas posibilidades

Telefónica anunciou hoxe que xa ten pechados acordos coa Biblioteca Nacional e coa empresa de distribución de e-books Publidisa (que xa conta cun catálogo de máis de 20.000 títulos), nunha aposta polos eReaders conectados, unha nova categoría de trebellos que abre un inédito concepto de uso para os actuais libros electrónicos e amplía o potencial da dixitalización dos contidos editoriais.
Este novo concepto ten que desenvolverse en dúas liñas: a dos dispositivos e a dos contidos. Nesta última, Telefónica mantén contactos cos principais provedores, e incluso conta cun expositor no Mobile World Congress no que, co apoio de Santillana, Anaya e Vocento, presentan algúns exemplo do que permitirá esta tecnoloxía de dispositivos conectados dun modo aberto, coma serían guías de viaxe interactivas, revistas enriquecidas con contidos multimedia ou sistemas de formación infantil (para o que contan coa colaboración de Telefónica Learning Services).

A posición no mercado de Telefónica pode resultar chave para o desenvolvemento desta nova liña de negocio, coma tamén aconteceu nos EE.UU. con Amazon e o seu Kindle, e incluso podería servirlle á compañía para emprender un proxecto dirixido a todo o mercado de fala hispana.
Os dispositivos de lectura de e-books actuais son bastante limitados, resultando unha simple tradución dos contidos do papel a un formato electrónico, pero dende a división de Contidos e Aplicacións de Telefónica consideran que os «contidos dixitalizados van moito máis alá (..) dende o seu enriquecemento con formatos multimedia e interactivos, utilizando as capacidades dos terminais, as pantallas táctiles e os televisores existentes; a incorporación de datos referentes á conexión; o acceso á mesma información de xeitos moi diversos (dende un móbil, un PC, un dispositivo de lectura…) cunha adaptación da experiencia adaptada a cada un deles».