Apple presenta o novo sistema operativo para os seus dispositivos móbiles

Hoxe foi a data elixida por Apple para dar a coñecer o que será o iPhone OS 4, renovación do sistema operativo do iPhone e do iPod Touch, terminais que superan os 85 millóns de unidades en todo o mundo, así coma tamén serve coma referencia do que permitirá o novo iPhone que previsiblemente porán á venda no verán, data na que sairá o novo sistema operativo.
Steve Jobs foi o mestre de cerimonias do evento de presentación, abrindo a sesión falando do bo resultado que está a dar o iPad, que dende o pasado sábado vendeu 450.000 unidades, 600.000 libros electrónicos e 3,5 millóns de aplicacións, polo que estamos ante un importante éxito non só do dispositivo, senón de toda a plataforma móbil.
Pero o evento estaba dirixido ao iPhone (aínda que tamén avanzaron que o iPhone OS 4 chegará ao iPad no outono), e así, continuo, asegurándose que o OS 4 achegaría importantes melloras, nas que destacouse principalmente a presenza da multi-tarefa, ou sexa, a posibilidade de executar aplicacións en segundo plano, o que facilita funcións coma: – escoitar música en streaming mentres se realizan outras tarefas no móbil – ter sempre aberta unha aplicación de VoIP para poder recibir chamadas en calquera momento – poder seguir utilizando a navegación GPS pese a non executar unicamente o TomTom (ou outra aplicación semellante) – recibir notificacións push

Os usuarios que fagan uso dun número moi elevado de aplicacións tamén agradecerán a posibilidade de poder agrupalas en cartafoles, mantendo o escritorio do iPhone máis ordenado (soportando tamén un maior número de aplicacións accesibles).
O correo electrónico no iPhone tamén mellora, permitindo a unificación de bandexas de entrada, de xeito que os usuarios que teñan varias contas configuradas no móbil poderán cambiar rapidamente entre as mesmas ou xestionalas como unha soa. Tamén incorporan a posibilidade de agrupar as mensaxes de correo electrónico en fíos (facilitando o seguimento de conversas).
Coma o iPad goza da aplicación de libros electrónicos iBooks, decidiron achegala tamén ao iPhone e ao iPod Touch, ampliando así a súa base de clientes.
De cara aos usuarios corporativos, o iPhone OS 4 contará con múltiples prestacións avanzadas que melloran a protección de datos, a administración do dispositivo e soporta redes privadas virtuais SSL, Exchange Server 2010 e múltiples contas de Exchange.

Como segredo a voces, no evento tamén deron a coñecer iAd, unha plataforma de publicidade para o móbil, que en boa medida servirá para financiar as numerosas aplicacións de balde que hai na App Store, agardando crear un sistema de anuncios equilibrado que non moleste excesivamente ao usuario. Incluso atrévense a estimar que poderían colocar ata 1.000 millóns de anuncios ao día, dos que compartiría o 60% dos ingresos cos desenvolvedores das aplicacións. Queda agora que as axencias de publicidade saiban tirar proveito do potencial desta plataforma.
Os programadores de aplicacións para o iPhone poderán acceder dende hoxe mesmo a unha versión previa do SDK para desenvolver para o novo sistema operativo, precisando que todas as funcionalidades tirarán no iPhone 3GS e no último iPod Touch. O iPhone 3G e o iPod Touch de segunda xeración tamén serán compatibles co iPhone OS 4 pero non poderán gozar de moitas prestacións como a multi-tarefa, xa que o se hardware non ten a potencia suficiente. Enténdese así que o iPhone OS 4G marcará un punto de disrupción, abrindo unha fenda entre os vellos iPhone e os novos, o que podería instar a moitos usuarios a renovar o seu terminal a partires do verán.

Demostración do funcionamento da multi-tarefa no iPhone