Negan que a Xunta vaia privatizar a TVG

A pasada fin de semana o diario El País publicou que o presidente da Xunta de Galicia, Alberto Núñez Feijoo estaba a estudar a posibilidade de realizar unha privatización parcial da Televisión de Galicia, cedendo parte da compañía á Asociación de Empresas Galegas do Audiovisual (AEGA), o que desmentiu o secretario xeral de Medios Alfonso Cabaleiro, quen matizou que tal posibilidade non nace dunha demanda da Xunta, senón que foi unha proposta de AEGA, asociación que aspira a asumir parte da produción de contidos da TVG, que quedaría só cos informativos, o que non parece coincidir cos plans do Executivo galego.
Cabaleiro engadiu que, lonxe da privatización da televisión «o que queremos é definir un modelo de televisión pública para os vindeiros 25 anos, un modelo de país e de consenso. Por iso, ademais das produtoras, tamén queremos escoitar a compañía, o comité de empresa, os políticos e os sindicatos».
Nos últimos meses a Xunta intenta paliar a situación da TVG, compañía cun forte endebedamento, polo que precisa dunha reformulación que vaia máis aló dun recurte de custos, e incluso pretendían lanzar unha Oferta Pública de Emprego que foi rexeitada polo Consello de Administración da CRTVG, o que dificultará a estabilidade laboral no ente público.