Google presenta un servizo de moedeiro electrónico baseado no móbil

As oficinas neoiorquinas de Google acolleron hoxe unha presentación de Google Wallet, un servizo desenvolvido en colaboración con Citi, MasterCard, First Data e Sprint para permitir converter os móbiles con tecnoloxía NFC (como o Nexus S) nun sistema de pagamento que pode ir moito máis aló de substituír ás tarxetas de crédito, pois aparte de axilizar a adquisición de produtos sen pagar en efectivo, tamén pode combinarse con cupóns e programas de fidelidade para clientes, e mesmo para tender unha ponte entre os establecementos electrónicos e os físicos.
Google Wallet gardaría no seu interior as nosas tarxetas de pagamento, as nosas tarxetas de fidelidade e os nosos descontos, de xeito que cando teñamos que realizar un pagamento o sistema realizará todo o proceso de xeito automático, aplicando os descontos correspondentes e acumulando os puntos de fidelidade se procede, aspirando tamén a servir no futuro de entradas virtuais para eventos, sistema de identificación e mesmo como chave.
Polo momento Google Wallet só está dispoñible para terminais Nexus S, agardando ampliar o número de terminais compatibles nos vindeiros meses.

O Google Wallet en acción nun vídeo publicado por Engadget