A televisión en liña da FECYT retransmite esta noite o eclipse total de Lúa

Como unha boa parte dos internautas galegos saben (imposible non sabelo a pouco que fagamos un repaso polos medios en liña), esta noite os habitantes da Terra imos ser testemuñas dun máis que interesante fenómeno astronómico: un eclipse total de Lúa, causado pola interposición desta planeta que pisamos entre o noso satélite e máis o sol. O fenómeno, que non volverá a producirse ata o 27 de xullo de 2018, só poderá ser visto en directo polas galegas e galegos que non vivan preto dunha fonte importante de luz urbana. Ou sexa, que tal e como está o panorama (con cheas de rúas, edificios, monumentos e campos de fútbol alumeados a plena potencia, moitos deles dando exemplo de pouca sustentabilidade), moi poucos serán os privilexiados. O remedio, unha vez máis, témolo na Rede.
Segundo avanza o FECYT, será posible ver o eclipse, en directo, a través da súa televisión en liña.
A transmisión, que se levará a cabo dende as Illas Canarias (en Tenerife, coa sombra do Teide apuntando á Lúa eclipsada), contará co apoio da Facultade de Informática da Politécnica de Madrid, que se encargará da distribución do sinal. A achega desenvolverase en directo durante dúas fases de media hora: a primeira entre as 21.45 horas e 22.15 horas, hora peninsular, coa formación e evolución da dita sombra do Teide durante o eclipse; e a segunda entre as 22.45 horas e as 23.15, coa Lúa xa cuberta. A sesión rematará cos primeiros brillos da lúa chea.