Asturias pon en funcionamento o seu Centro de Produción de Contidos Dixitais

Asturias recibiu esta semana un importante pulo para o eido dixital da súa economía e, tamén, da súa contorna (incluíndo o noso país). Falamos da apertura e presentación en Uviéu (Oviedo) do Centro de Produción e Experimentación en Contidos Dixitais, un espazo de investigación que vén da man de Red.es (Ministerio de Industria), da CRUE e da Universidade local, que é onde precisamente se empraza. O seu cometido básico será favorecer a formación en novos formatos e linguaxes creativos e comunicativos, facendo fincapé na produción audiovisual, o desenvolvemento das tres dimensións e a realidade aumentada.
O Centro, dotado cun orzamento de 728.161 euros (procedendo o 70% de Red.es grazas ao Fondo Europeo de Desenvolvemento Rexional, e o 30% restante da dita institución educativa asturiana), conta con tres estudos de produción audiovisual (un deles especializado na vangarda en 3D) e un laboratorio de experimentación en posprodución, deseño-animación e renderización. Asemade, incorpora un sistema de realidade aumentada e outro de experimentación de contidos dixitais, ademais de dispor do equipamento preciso para o almacenamento, distribución e publicación do produto da dita experimentación.
O Centro xa recibiu para a súa posta en marcha o apoio de máis de 30 empresas do sector, directa ou indirectamente implicadas nas novas tecnoloxías audiovisuais e beneficiarias, polo tanto, dos profesionais e dos proxectos aos que dea acubillo este espazo de investigación.
O desenvolvemento deste Centro insírese no Plan de Impulso da Industria de Contidos Dixitais do Plan Avanza2, cuxos obxectivos básicos pasan por achegarlle ao mercado estatal máis profesionais neste tipo de novas ferramentas da creación ou por desenvolver colaboracións universidade-empresa. “A creación destes centros de produción nas universidades, xunto co desenvolvemento de novos programas formativos na xeración de recursos tales como videoxogos, animación 2D/3D, realidade virtual, deseño gráfico ou edición avanzada de audio e vídeo”, informa o Ministerio de Industria.