Localia Vigo e Coruña comezan a emitir en R

Localia Vigo Televisión sube un novo chanzo de actividade da man do operador galego R, logo de case unha década de emisións e terse afianzado na cidade galega e na súa contorna como un importante punto de información local. Segundo informan os responsables da cadea, esta nova andaina comezará oficialmente o venres 1 de xullo coas emisións de Localia Vigo a través da oferta de canles do operador R (dende a que hai máis dunha semana que xa pode recibirse o sinal da canle local), chegándose deste xeito a 90.000 fogares galegos. O único requisito esixido para recibir o sinal da cadea é sintonizar a canle 136 dos descodificadores.
Localia Vigo, que en breve celebrará o seu décimo aniversario de actividade, cobre arestora, coas súas emisións en TDT a través da canle 34 da UHF practicamente o 100% da audiencia de Vigo e o 83% dos concellos que forman parte da súa contorna: Redondela, Baiona, Bueu, Cangas, Gondomar, Moaña, Mos, Nigrán, O Porriño, Salceda de Caselas e Soutomario.

Localia Coruña, tamén en toda Galicia

Actualmente a demarcación da TDT de ámbito local de A Coruña, pese a contar con 3 concesións, só ten operativo o sinal de Localia Coruña, e grazas á súa incorporación a R a súa programación pode recibirse dende os fogares co servizo de televisión multicanle do operador de cable por toda Galicia, o que é posible dende o pasado 21 de xuño.
As emisoras galegas de Localia xa estaban dispoñible para os clientes de R a través do sinal de TDT que achega a compañía (en cadansúa cidade) pero coa incorporación dos seus programas á oferta multicanle as súas emisións convértense en autonómicas e facilítase a súa recepción dende o descodificador televisivo.

Vídeo promocional da incorporación de Localia Coruña á oferta televisiva de R