Coremain terá que entregar os novos equipos de ABALAR antes do 21 de setembro

A Consellería de Educación fará chegar no vindeiro curso un total de 15.000 equipos informáticos ultraportátiles para o alumnado de quinto de Primaria e segundo de ESO, unha iniciativa que virá acompañada dun investimento de 5,2 millóns de euros. Unha vez máis, a empresa encargada de achegar os computadores será a firma Coremain, que segundo se estipula nos prazos de Educación, terá que entregar os equipos antes do 21 de setembro, a data límite. Cómpre lembrar que o ano pasado, a empresa con sede en Santiago non foi quen de levar os ordenadores ata o colexio a comezos do curso, cousa que se retrasou varios meses e orixinou un bo número de críticas.
Os días vindeiros manterase aberto (ata o 21 de xullo) un prazo de dúas semanas para que as empresas do noso sector TIC teñan oportunidade de recorrer a decisión de ter elixido unha vez máis a Coremain.
Cómpre lembrar que o ano anterior, estes procesos desenvolvéronse máis tarde, polo que é de supoñer que o adiantamento dos mesmos este verán responde a un interese da Consellería por evitar que aconteza o mesmo. Desta volta os equipos terán que estar antes do 21 de setembro no almacén que a Consellería ten na Estrada, contemplándose a posibilidade de entregalos xa directamente aos centros da Xunta co fin de axilizar ao máximo o proceso. Con todo, fixáronse máis esixencias por parte de Educación para evitar os adiamentos do ano pasado. Por exemplo: un punto concreto no prego de condicións no que se especifica que a firma con sede en Santiago deberá facer a entrega nos dous meses fixados. De non darse así o proceso, a empresa perdería o 0,02% do prezo do contrato por cada xornada de adiamento. Ou sexa, que desta volta, Coremain perdería 104 euros ao día.