As mascotas gañan popularidade nas redes sociais

Na Internet as fotos de michiños e os vídeos de cadelos levan tempo sendo todo un éxito, e agora confírmao un novo estudo encargado pola aseguradora PetPlan que sostén que 1 de cada 10 das mascotas do Reino Unido teñen páxina en Facebook, conta en Twitter ou canle en YouTube, á vez que máis da metade das persoas con mascotas comparten fotografías das mesmas a través da Internet.
Aínda que existen páxinas web específicas para mascotas, nas plataformas xeneralistas están a causar furor, e coma exemplo temos que o gato xaponés Maru ten 140.200 subscritores na súa canle de YouTube que sumou máis de 108 millóns de reproducións; o cadelo Boo ten máis de 1,3 millóns de seguidores en Facebook, espazo no que moitos usuarios ven simpáticas imaxes do animaliño (que en moitas das instantáneas viste diferentes camisetas) que acumulan milleiros de Gústame cada hora; o gato Sockington está preto dos 1,5 millóns de seguidores en Twitter;e mesmo Beast, o Puli de Mark Zuckerberg e Priscilla Chan, é unha das mascotas máis populares da Internet.
Ao parecer, este éxito das mascotas na Rede non deixa de ser un simple reflexo da importancia que teñen os nosos peludos amigos nas nosas vidas, aínda que resulta curioso que en moitos casos superen en popularidade aos seus donos.