A operadora Intermax contribúe á promoción das festas locais na Rede

A operadora de telecomunicacións melidense Intermax, que está a levar a banda larga ao rural galego a través de redes de telecomunicacións sen fíos, está a sorprender nos últimos días con certas iniciativas que afástanse do seren meros provedores de conectividade á Rede, amosando unha cara social da empresa, na que reflicten a súa proximidade coa veciñanza, coa que teñen unha relación moi estreita para a achega dos permisos necesarios para a instalación de postes e torres de comunicación en terreos mancomunados e privados, o que ten como contrapartida o compromiso de levarlles o acceso á banda larga e tamén a participación activa na promoción das súas festas e empresas patrocinadoras.

Deste xeito, Intermax preséntase como unha operadora social que inclúe as TIC no rural e tamén na promoción das súas festas, como queda evidente coa creación da páxina web das Festas da Virxe das Neves de Santa María de Melide, onde poden verse as orquestras que participan, os patrocinadores das mesmas e o xeito de chegar á poboación, facilitando que a xente moza saiba cómo chegar a este tipo de festividade tan propia do país.
O pasado 22 de xullo Intermax tamén colaborou coas festas de Carvia (Vila de Cruces, Pontevedra), a onde achegaron infraestrutura de rede de transporte e acceso, o que permitiu que os mozos puideran conectarse á Internet de balde durante a celebración da festividade.
Precisamente na zona Intermax instalou un novo repetidor o pasado domingo, nunha torre de 15 metros alimentada por enerxía eólica no monte Facha de Vila de Cruces, nunha localización cedida pola Asociación de Veciños, que xuntou a outras 6 instalacións na mesma zona postas en marcha nos últimos 2 meses mellora a expansión da operadora polo sur de Lugo e norte de Pontevedra, ofrecendo unha cobertura próxima ao 100% nos concellos onde dan servizo. Están incluídos neste plan de expansión Antas de Ulla, Monterroso, Palas de Rei, Agolada, Rodeiro, Lalín e Dozón.

Durante as festas de Carvia puideron gozar de conexión á Internet grazas a Intermax

Instalación de Intermax en monte Facha

Proxecto Igrexa 2.0

Os servizos de telecomunicacións sen fíos non serven só para conectarse á Internet, senón que tamén sosteñen servizos de distinta índole como o de videovixilancia, o que veñen de presentar na igrexa parroquial de San Xoán de Furelos (Melide), unha das 8 parroquias de Melide, Arzúa e Santiso nas que Intermax instalará un sistema que facilitará a seguridade dos lugares de culto, podendo aproveitarse tal infraestrutura para a retransmisión de misas en liña ou para tocar as campás a través do móbil.

Presentación do proxecto de videovixilancia nas igrexas de Melide, Arzúa e Santiso