Anulan 2 das 3 concesións de TDT para Vilagarcía de Arousa

O concurso de licenzas de Televisión de Dixital Terrestre (TDT) de ámbito local en Galicia continúa a amosar as súas deficiencias, e tras anularse as adxudicacións de Pontevedra e Ferrol, a semana pasada a Sala do Contencioso-Administrativo do Tribunal Superior de Xustiza de Galicia declarou nulas 2 das 3 concesións de Vilagarcía de Arousa.
Segundo a sentenza número 488/2011 as adxudicacións a Lérez Canal 29, S.L. e Editorial La Capital, S.L. (compañías que aínda hoxe non comezaron as súas emisións) son contrarias a Dereito por infrinxir o artigo 7.1 da Lei 41/1995 de Televisións Locais e o artigo 7 do prego de bases que regula o concurso de adxudicacións, ou sexa, pro non respectar a prohibición de formar cadeas televisivas. Deste xeito, a única canle de TDT que mantería licenza na demarcación sería a de Televisión da Mancomunidade do Salnés, S.L., coñecida popularmente como CanalRíasBaixas.
Esta resolución parte da denuncia de D. José Mosquera Mera, que tras non resultar adxudicatario no devandito concurso de 2006, impugnou o reparto de canles, que polo que se ve agora, resulta prexudicial para o público, xa que en moitas localidades caeu a oferta de contidos locais por non resultaren adxudicatarias moitas das canles en funcionamento en Galicia, e non pasando a ocupar o seu lugar ningunha das compañías adxudicatarias, que non están a explotar a súa licenza, incumprindo as condicións do concurso.