O comercio electrónico en España facturou máis de 2.000 millóns de euros no primeiro trimestre do ano

A Comisión do Mercado das Telecomunicacións vén de publicar un informe sobre o comercio electrónico en España no que destacan un incremento de facturación por 8º trimestre consecutivo chegando aos 2.055,4 millóns de euros (un 23,1% máis que o mesmo período de 2010). En total, durante o primeiro trimestre de 2011 contabilizáronse 30,2 millóns de transaccións, o que supón un crecemento interanual do 28,2%.
Como vén a ser habitual, a meirande parte das operacións corresponderon ás viaxes e aos operadores turísticos (12,4%) e ao transporte aéreo (12,2%), seguidos polo marketing directo (6,3%), o transporte terrestre de viaxeiros (6,1%), os xogos de azar e apostas (4,9%), os espectáculos (4,1%) e a roupa (3,5%).
Tamén medraron un 5,78% as compras efectuadas ao estranxeiro, cunha facturación de 925,56 millóns de euros, aínda que resultou moito máis espectacular o feito de que as compras dende o exterior de España medraron un 77,3% rexistrando 311,96 millóns de euros durante o primeiro trimestre do ano.