Amazon.es botará a andar o 15 de setembro

Tras moitos anos de rumores, confírmase que a famosa tenda electrónica norteamericana Amazon chegará oficialmente a España o vindeiro día 15 de setembro, presentándose oficialmente o día anterior por parte de Greg Greeley, o vicepresidente da división europea da compañía, aínda que polo momento limitarase a produtos físicos (libros, música, vídeos, electrónica…), mentres que para a chegada da plataforma electrónica Kindle teriamos que agardar un chisco máis, por ser moi complexas as negociacións coas editoriais españolas.
El País confirma que Roca Editorial e Libros del Asteroide están en proceso de asinar un acordo de distribución dixital con Amazon, mentres que outras como Random House e Santillana xa vendían libros físicos a través de Amazon.com (polo que agárdase que as negociacións coas mesmas sexa máis sinxela), pero distintas fontes do sector apuntan a que teremos Kindle en España antes de rematar o presente ano.
Amazon xa entrara en España o ano pasado mediante a adquisición de BuyVIP, o que viña a ser un anticipo do lanzamento de Amazon.es, tenda en liña que empregará a compañía MRW para o transporte.
A información relativa a este lanzamento chega polo momento a través de editoriais coas que traballa Amazon, non existindo confirmación oficial do lanzamento de Amazon.es o vindeiro día 15.