Este xoves comezan en Lugo as xornadas de informática xudicial do CPETIG

Este 15 de setembro, xoves, arranca en Lugo o Seminario sobre Informática Xudicial, Peritaxe Técnica e Proba Electrónica, unhas xornadas que abranguen tamén o venres 16 e que van dirixidas a darlles continuidade e espallamento ás celebradas en Santiago acerca deste eido: o traballo dos xuíces, maxistrados, fiscais e avogados en relación directa coas novas tecnoloxías. A actividade, que se celebra en horario de tarde, das 17 ás 21 horas, contará no acto de apertura coa presenza da subdirectora xeral de Sistemas de Información da Administración Pública da Xunta, María José García Sexto, que estará acompañada do presidente do CPETIG, Marcos Mata.
O seminario, que se desenvolve no Salón Madeira do Hotel Méndez Núñez, no número 1 da Rúa da Raíña, ten o seguinte obxectivo: informar e concienciar aos xuristas dos avances en materia probatoria nos casos en que entre en xogo o elemento informático. Asemade, informa o CPETIG, buscarase con este seminario “sensibilizar sobre a axuda que poden prestar os peritos informáticos nas causas xudiciais e as claves de valoración da proba informática”.
Programa
O evento, a desenvolver en dúas xornadas, contará coa participación dalgúns dos máis reputados expertos en materia de TICs e procesos policiais e xudiciais de todo o territorio estatal.
Na primeira xornada, a que se desenvolverá o vindeiro xoves 15 de setembro, o primeiro relatorio correrá a cargo do avogado Victor Salgado, socio do Bufete Pintos&Salgado, que abordará o tema do Dereito das novas tecnoloxías.
Esta xornada completarase coa conferencia do fiscal especializado en Criminalidade Informática da provincia de Pontevedra, Luis María Uriarte, que abordará o tema da proba electrónica e a súa importancia no proceso xudicial.
A segunda xornada, que se vai desenvolver o venres 16 de setembro, contará coa presenza do Xefe do Grupo de Delitos Telemáticos da Comandancia da Garda Civil en Pontevedra, Gonzalo Sotelo, que disertará sobre a o protocolo forense en probas electrónicas.
Esta segunda xornada formativa completarase co relatorio do perito do Corpo Oficial de Peritos do Colexio Profesional de Enxeñería Técnica en Informática de Galicia (CPETIG), Miguel Abal, que abordará na súa intervención o tema da práctica pericial informática.