As empresas de EGANET contarán con servizos de valor no eido da propiedade industrial

A asociación galega EGANET e a empresa Clarke, dedicada ao asesoramento e xestión de labores ligadas á propiedade industrial e intelectual, asinaron esta semana un acordo de colaboración para impulsar nas empresas TIC do noso país a protección dos seus produtos e servizos con vistas a crear marca e prestixio. O acordo, formalizado polas dúas entidades (representadas por Víctor López, de EGANET, e o director xeral de Clarke, Modet & Cº España, Alejandro Klecker de Elizalde), significa entre outras cousas que as firmas integradas na asociación galega poderán dispor de servizos de valor engadido no ámbito da propiedade intelectual e industrial.
Asemade, recibirán asesoramento en acordos de transferencia, e un servizo de información e posicionamento tecnolóxico, así como a protección dos novos modelos de negocio na rede.
Amais, informa EGANET, o acordo abrangue prácticas de xestión e actividades de formación especializadas no eido TIC, “adaptadas ás crecentes necesidades deste sector e das súas empresas integrantes no tocante á xestión dos dereitos de propiedade industrial e intelectual”. O convenio tamén inclúe, entre outras cousas, o desenvolvemento de relatorios sobre o devandito eixe temático relativo á salvagarda da innovación, achegando “unha visión xeneral e actualizada dos diferentes dereitos desta propiedade, así como da súa protección, fomentando o seu coñecemento e facilitando a súa xestión integral”. Todo isto suporá a posta en marcha dunha xanela única na web de EGANET que servirá para “canalizar as consultas en materia de propiedade”.