A USC achega este xoves unha serie de claves para levar á nosa empresa TIC ata o máis alto

Este xoves 22, as persoas que neste intre teñan entre mans un proxecto tecnolóxico viable e precisen financiamento, ou, mellor dito, portas nas que petar á procura de financiamento, teñen unha cita obrigada en Compostela, máis polo miúdo no Centro de Estudos Avanzados (na finca de Vista Alegre), sede da xornada de traballo Investment Rediness. A busca de financiamento das empresas tecnolóxicas. O encontro, organizado pola Universidade de Santiago en colaboración coa Xunta, vai especialmente dirixida a emprendedores, persoal técnico de apoio empresarial e profesionais ligados ao eido do investimento privado. Na xornada intervirá, entre outros relatores, María Antonia Otero, conselleira de Jazztel.
Entre outras cousas, a cita servirá para pór sobre a mesma unha serie de consellos e ideas de valor sobre que pasos seguir de querer levar a bo porto o noso proxecto de empresa tecnolóxica.
O encontro, promovido polos programas Inberso e Woman Emprende, abrirase ás 10.00 horas da man do vicerreitor de Investigación e Innovación, Francisco González;, estando prevista ademais a asistencia da secretaria xeral de Igualdade, Marta González; do director xeral de I+D+i, Ricardo Capilla, e do director do programa Uniemprende, Carlos Hernández.
Logo da introdución que realizará o director para a Península Ibérica de Inberso, Alfredo Bermúdez de Castro, comezará a quenda de intervencións cun relatorio da conselleira de Jazztel e presidente da Innotarget, Mª Antonia Otero, reflexionando sobre Que valor a persoa inversora á hora de analizar un proxecto?.
A xornada reunirá persoas expertas e investidores que orienten e acompañen os emprendedores no proceso de procura de financiamento privado. “O encontro”, sinala a USC, “tamén abordará novas formas de crear empresas, atendendo a criterios socialmente responsables e o liderado feminino a través da experiencia de mulleres que tiveron un papel indispensable no desenvolvemento das organizacións que lideran”.
Xa nun eido máis específico, dicir que entre os moitos temas a tratar haberá un par deles que nos tocan ben de preto, pola súa natureza tecnolóxico-dixital, como por exemplo as medidas a tomar para facérmonos un oco en Silicon Valley, o berce da industria TIC tal e como a coñecemos.