Facebook presenta o seu novo Timeline

Esta tarde realizouse unha presentación das novidades que incorporarán a Facebook nas vindeiras semanas, entre as que figura unha funcionalidade chamada Timeline, que supón a evolución dos perfís de usuario, que deixarán de ser unha ficha descritiva para transformarse nun reflexo da comunicación que se mantén cos amigos e, mentres no taboleiro de cadaquén podemos ver as actualizacións publicadas por orde cronolóxica inversa, no caso do Timeline veremos elementos destacados da nosa vida, como podería ser unha fotografía do casamento ou do nacemento dun fillo, que resultará de máis interese para quen queira achegarse a unha persoa que a hora á que se ergueu o ou que almorzou.
O Timeline será máis visual que o perfil tradicional en Facebook, destacando por presentar unha fotografía de grande tamaño na súa parte superior dereita, como se fose unha portada, deixando ao usuario o control das imaxes que quere destacar. Un dos detalles máis prácticos desta cronoloxía é que poderemos viaxar no tempo para completar a información de cada un dos elementos que destaquemos.
Pero o Timeline non será a única novidade que achegará Facebook, senón que tamén poderemos gozar de elementos como os verbos, ou sexa, que o Gústame non será o único que poderemos facer, senón que tamén poderemos estar lendo un libro, vendo unha película ou escoitando unha canción.
Tamén mellorarán a integración coas aplicacións, de xeito que poderemos facer cousas como sincronizar a reprodución musical en Spotify entre varios usuarios ou compartir o que vemos en Netflix (servizo aínda non dispoñible en España).

Vídeo de presentación do novo Timeline