A Rede galega comeza a darlle forma a un documental sobre a emigración galega 2.0

GalegoLab infórmanos esta semana dun novo proxecto materializado no seu seo, a través do apoio dos internautas, e que suporía un novo punto de vista sobre a realidade da nosa emigración e de como agora esta, coa concorrencia das novas tecnoloxías, establece novos vínculos de comunicación, participación e interacción coa terra nai e, dende ela, co mundo. A iniciativa en cuestión non é outra cousa que un proxecto para unha peza audiovisual, un documental sobre a diáspora galega, todo baixo un óptica 2.0 ou, o que é mesmo, atendendo ao potencial das novas redes como elemento de contacto e comunicación coas galegas e galegos que están fóra do país, facendo país.
Segundo informa GalegoLab, ao igual que nas iniciativas precedentes que abrollaron do seu seo, precísanse voluntarios para dar forma ao proxecto. En concreto, son necesarias sete persoas que busquen galegos que residan fóra e dúas persoas máis para participar na realización gráfica e na edición do proxecto. Este, tematicamente, parte da seguinte realidade: a nosa terra é un país global. Tendo en conta iso, e tendo en conta o moito que temos achegado, demográfica e culturalmente, ao mundo, se cadra é máis preciso que nunca que tratemos de recoñecérmonos a nós mesmos nesa realidade, dos que marchando lonxe quixeron manter a lingua galega para a comunicación.
O traballo, como dixemos, fará especial fincapé nos emigrantes que, ademais de seren galegos que viven fóra, son tamén internautas e usuarios das redes sociais. “Conectados ás redes a tempo completo teñen unha relación máis estreita con Galiza grazas ás tecnoloxías da información e da comunicación”, infórmase dende GalegoLab, dende onde se describe “unha cidadanía máis informada e, xa que logo, máis crítica”. En definitiva, a intención das/os creadoras/es deste proxecto é descubrir os problemas da emigración galega actual e a súa realidade, pois forman parte do futuro do país.